Pesan Natal dari BPHMS BNKP

FEHEDE NI’OROI’Ö BPHMS BNKP BA WANUNU FANDRU 2021

Nifosumange ba ni’omasi fefu mbanua niha Keriso awö ndra awöma sohalöŵö ba zisagörö BNKP. Moroi ba wa’omasi Lowalangi ba khö Keriso Yesu, ma’owai ami fefu: “Ya’ahowu Wanunu Fandru, 25-26 Desember 2021.

Lakhömi khö Lowalangi si yawa, me si sökhi tödö Ia, ba me si lö mo’aetufa wa’ebua dödö-Nia andrö ba nösi gulidanö. Ha börö wa’omasi-Nia wa no tola talalöi ginötö si no numalö. Na dali wa’abölö ba fa’atuatuada, no si lö boto, ba no oroma wa tebai manö talau hadia ia ba lö manö mofozu ngawalö hadia ia, ba oi saekhu ba wa’ate’ala ba ba wa’atekiko lualua. Na dali mbuabuada, ba no manö ihawui ba iböbö ita fa’ara’ira’iö. Si tekiko lualua ba luo horö andrö ba fa’amate.

Atulö niwa’ö zura zangombakha wa fefu hadia ia zalua ba gulidanö ba no si lö boto. Da’ö zifalukha nösi gulidanö, mendrua manö ba ginötö Pandemi Covid-19, inönö ngawalö wamakao salua, he ni’a’asogö niha gulidanö, ba mendrua manö göi ngawalö zalua ba gölia, simane duru danö, molö, fa’aruru danö, fa’amamoka hili – no oi tobali börö wamakao, fangaröngarö ba fa’atekiko.

Bahiza wa’ebua dödö Lowalangi, si lö mamaigi ya’ita ba horö awö wa’ara’iöda, lö mamalö fao IA khöda, awöda Lowalangi ba khö Yesu Keriso. Fao Ia khöda ba wangawalö wamakao sifalukha. Ya’ia zi lö mamalö manasai ya’ita börö getuna horö. Ya’ia zi no mamazawa ya’ita me falukha wa’alau ba fa’aekhu ba mbaho fangaröngarö. Ya’ia zi no mangatuatua’ö ba wamalua fefu halöwöda, he ba halöwö zamösana, ba simanö halöwö ba mbanua Niha Keriso ba BNKP. Ya’ia zondrara tödö ba gabula dödö ba ba wa’aetu wanötöna. Ya’ia gubalo si lö faröi, we’ewe’e dödö saro, si no Imanueli, awöda Lowalangi.

Andrö ba wondrugida inötö wuawua dödö andre, ba tefasugi ba dödöda wa’ebua wa’omasi Lowalangi, si no mamatenge OnoNia si ha sambua ba wangöhöli, ba wangorifi, ba ba wondrorogö ösi gulidanö. Andrö börö da’ö data’andrö saohagölö khö Lowalangi solomasi, ba ha khöNia manö zumange ba lakhömi götögötö wa’ara, he menewi, he ma’ökhö, he irugi zi lö aetu.

Faudu ba Tema Natal ba ndröfi andre me imane: "Fa'omasi Keriso danedane wamalua fa'omasi ba dalifusö" . Moroi ba tema Natal andre, ma’oroi’ö khöda:

1. Fa’omasi Lowalangi andrö zi tobali lolohefö, we’ewe’e dödö wa nohugö fa’auri ba ginötö miföna, hewa’ae oya dabitabi, famakao, ba ngawalö gametauö. Imanueli, awöda Lowalangi.
2. Börö wa’omasi si no falukha ita soroi Lowalangi ba khö Keriso Yesu, andrö data’o’aurifagö mbuabua wa’omasi andrö, he ba wangomasi’ö Lowalangi, ba mufonga’eu da’ö ba wangomasi’ö awö. Ena’ö tenga ha huohuo, tenga ha ba wehede, ena’ö mufonga’eu wa’omasi andrö, tabörögö moroi ba zoroi yomo, sifatalifusö, ba zi falazi omo, ba zi sambua lingkungan, ba zi sambua jemaat, ba ba niha fefu, hewa’ae fabö’öbö’ö soi, li awö lala wamati.
3. Ma’oroi’ö ba jemaat-jemaat awö resort ba zi sagörö BNKP, ena’ö mubali’ö tuho halöwö wamalua HALOWO FANGOMASI’Ö, ma nifotöi Diakonia. Mo’ömö ita wamalua fanolo ba zinumana, fanolo beasiswa ba ndraono zi numana, halöwö fondrou’ö fa’atuatua, nekhenekhe danga ba wohalöwö, ena’ö falukha wuawua dödö mbanua niha Keriso.
4. Ena’ö fa’omasi Lowalangi andrö, ba mufalua mufonga’eu ba ndraono awö zibohou ebua. Andrö monoro dödö dozi fongambatö ba wamahaö iraono yomo ba nomo, ba wangomasi’ö ya’ira, ena’ö tobali iraono sangata’ufi Lowalangi ira, ba aro ba lala wamati. Ena’ö göi da’e mubali’ö tuho halöwö ba jemaat-jemaat
5. Ena’ö FA’OMASI andre göi danedane ba wamalua famöfö’ö ba gotalua mbanua niha Keriso, mendrua manö ba wangobini awö wamöfö’ö ira sohalöwö ba Jemaat, resort, he göi ba sinode nifalua ba ndröfia.
6. Me no so ita ba gotalua nifotöi new normal, ma ‘lala wa’auri si bohou’ – andrö ma’oroi’ö ena’ö ba lala döröwa, lala halöwöda – data’o’ö ngawalö wanurutu lala soroi famareta, nifotöi protokol Kesehatan, ba fao ita ba program vaksinasi nifalua zamatörö.

Simanö wangowaima, awö wehede ni’oroi’ö ba mbanua niha Keriso ba zi sagörö BNKP, ya falukha ami fefu wa’ebua dödö Zo’aya ya’ita Yesu Keriso, fa’omasi Lowalangi, awö wa’awösa Geheha Ni’amoni’ö ba wanörö lala wekoli ba ndröfi fönada, 2022.
Andrö maowai ami fefu :

"Ya’ahowu Wamaondragö Döfi si Bohou, 1 Januari 2022." YADUHU

 

Gunungsitoli, 18 Desember 2021
Badan Pekerja Harian Majelis Sinode BNKP

Ephorus,	Sekretaris Umum,	Bendahara Umum,
dto	dto	dto
Pdt. Dr. Tuhoni Telaumbanua, M.Si	Pdt. Dorkas Orienti Daeli, MTh	Pdt. H. Zega, STh