[Tedõni dorosi, möi ndra sohalöwö bakha ba gosali (Solohe Röfa, Solohe Buku Niamoni’ö, Solohe Lili, Sangai Huhuo Sebua, Sangai Agendre ba Sangowuloi Ame'ela)].
Sondrönia'ö : Manunö moroi ba BZ No. 3 Masuno’ö Yehowa
-
Sumange la’ohe khö-U, mala’ika awö niha.
Dozi ira manunö, lasunosuno Yehowa.
Lira lö mo’aetufa, götögötö wa’ara.
-
Ya ahakhö dödö-Mö, wamolala ae tödöma.
Be’e howuhowu-Mö, me no Öfabu’u khöma.
Khö-U madönadöna i, me khö-U so wangorifi.
-
Solomasi Ndra’ugö, ba mboto he ba nosoma.
Ö’efa’ö ndra’aga, ba wamaelungu zatana.
Ya'ugö gubaloma, sondrorogö ya’aga.
Fehede Famaehagö moroi khö Ketua Komisi Perempuan
FANGOWAI BA FOGAONI
Liturgos : Moroi ba Komite Hari Doa Sedunia Komisi Perempuan ba Negara Hulo Cook, Ya’ahowu ndra talifusö ni omasi’ö si no tohare. No owulo ita ba da’e ha sambua boto ba wa ngowasaini halöwö Lowalangi sahölihöli dödöda ba wa aurida. Ia da’e tafaoma ta’owai nawöda ba li Maori: "Kia Orana", fehede ba li Maori ni oguna’ö niha soi Hulo Cook. Kia Orana eluaha nia ena’ö anau ndröfiu ba falawu howuhowu.
Kia Orana...!!!
Jemaat : Kia Orana!
Liturgos : Ya faofao khömi Lowalangi!
Jemaat : Ya fao khöu Geheha-Nia!
FOGAONI
Liturgos : Da ta honogӧ dödöda wangondrasi Yehowa, da ta’erönusi tödöda wamakao si no itaögö So’aya ya’ita Yesu Keriso, manunö ita moroi ba Mbuku Zinunö No.
22
- Ae dönisi göi dödögu, wanöngöni nilau-Mö.
Ba bokai hörö dödögu, fa u’ila dödö-Mö.
No fahöna wa’omasi, fatolosa, fangorifi.
Fa’ahakhö dödö-Mö, fefu mbörö ba da’ö.
- He abu sibai dödögu, na gönado fotu-Mö.
Ba wangoroma’ö khögu, fa’omasi-Mö andrö.
Da’ö lala ba wogaoni, ya’odo ba wangorifi.
Lö omasi Ndra’ugö, na te’ala ndra’odo.
- Fondrorogö nama ono, wondrorogö-Mö ya’o.
Hulö ae ba gafi moyo, wolohe-Mö ya’odo.
Na so mbaho fama’ala, Ötaya fa böi te’ala.
Na so hili wamakao, Ö’onoro, Öfasao.
- No fahöna howuhowu, ha wa’oya mbuala-U.
No Ötandrösaigö khögu, wangorifi mbanua-U.
Ha khö-U u’ohe zinunö, ba fangandrö saohagölö.
Ya sumange-Mö ndra’o, khö-U ululu ndra’odo.
FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Otahögö ndra’o ba ebua’ö dödö-U khögu! noa sa aomö'aomö ndra’o ba sinumana! HALELUYA!!!
Liturgos : Mangandrö ita, "He Yehowa Lowalangi, Ama sahakhӧ tödö ba sebua fa’omasi si no umbu howuhowu ba fa’auri. Itörö tödöma wamakao Zo’aya ya’aga Yesu Keriso, No Ӧlulu nono-U omasiö ba danga zokhӧ horö: te’o’aya, tefakao, teforöfa ba mate börö horöma. Fahaö ndra’aga, fa’aboto ba dӧdӧma ngawalö horö si no mafalua. Abölö’ö ndra’aga wolawa fa’abölö nösi, ena’ö mo’ahonoa ndra’aga ba wamalua somasi nama, ba khö Zo’aya ya’aga Yesu Keriso ba ba Geheha Ni’amani’ӧ, Yaduhu!" Mudadao Zato
Liturgos : Manunõ ita moroi ba Mbuku Zinunõ No.
213
- No tenga sa sinangea, ndra’odo föna-U, Yesu.
No usawö, no ulawa, goroisa ma’afefu.
Ba gamuatagu andrö, no u’o’aya göi döi-Mö,
he Yesu, orifido.
- No abu sibai dödögu, andrö mangaluludo.
Lö baero Ndra’ugö, Yesu, sabölö ba wanolo.
Andrö mangesa dödögu, ba horö fefu nilaugu,
he Yesu, orifido.
- He Yesu, da u’andrö khö-U, be’e aefa horögu.
Usao’ö fefu föna-Mö, khö-U ululu dödögu.
Duhu, do-Mö wangefa’ö, horö nösi gulidanö,
he Yesu, orifido.
- Andrö u’o’ö Ndra’ugö, me faduhu dödögu.
Wa lö sa baero Ndra’ugö, zangefa’ö horögu.
He Yesu, hakhösi tödö-U, temado ba wa’omasi-U,
he Yesu, orifido.
FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura
II Moze 20 : 1-17
1 Ba iwa’õ daroma li andrõ fefu Yehowa, imane:
2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami.
3 Bõi so khõmõ Lowalangi tánõ bõ’õ, baero ndra’o.
4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ.
5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu,
6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ.
7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya.
8 Ame’egõ tõdõ luo wolombase andrõ, ba we’amoni’õ ya’ia.
9 Õnõ ngaluo mohalõwõ ndra’ugõ ba õhalõ halõwõu fefu.
10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha.
11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ.
12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu.
13 Bõi ange’e.
14 Bõi ohorõ.
15 Bõi anagõ.
16 Bõi bõbõgõ khõ nawõu zi lõ duhu.
17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA
FEHEDE DӦDӦ NDRA’ALAWE, FANGANDRӦ FANGEFA HORӦ
Liturgos : Mӧi ita ta’ondrasi Lowalangi si fao fangidengide’ӧ ba fangandrӧ saohagӧlӧ, tafati wa halӧwӧ Lowalangi no sahӧli dӧdӧ, ba ta’andrӧ khӧ Lowalangi ena’ӧ ibokai hӧrӧ dӧdӧda ba wangi’ila ni wӧwӧi-Nia sahӧli-hӧli dӧdӧ ba daromali-Nia. Mangandrӧ ita :
Lowalangi si no afӧnu fa’abӧlӧ, ma’andrӧ saohagӧlӧ wa’omasi-Mӧ sebua, si no ma ma zӧkhi ya’aga tӧra moroi ba ni wӧwӧ’i fefu. Si mane si no te sura ba sura Zinunӧ 139:14, ma faduhu’ӧ wa no ni fazӧkhi danga-U ndra’aga sahӧlihӧli dӧdӧ. Ma’andrӧ saohagӧlӧ mbotoma ba nosoma si no Ö’fazӧkhi si fao fa’omasi.
Jemaat : He Lowalangi mӧiga ma’ondrasi ndra’ugӧ sifao fangidengide’ӧ, me no maulu wa ma zӧkhi-U ya’aga. Ma’alui lakhӧmi-Mӧ sebua ba wa’aurima.
Liturgos : Mӧi ita ta’ondrasi Lowalangi si fao fangidengide’ӧ ba fangandrӧ saohagӧlӧ, tafati wa halӧwӧ Lowalangi no sahӧli dӧdӧ, ba ta’andrӧ khӧ Lowalangi ena’ӧ ibokai hӧrӧ dӧdӧda ba wangi’ila ni wӧwӧi-Nia sahӧli-hӧli dӧdӧ ba daromali-Nia. Mangandrӧ ita :
Lowalangi si no afӧnu fa’abӧlӧ, ma’andrӧ saohagӧlӧ wa’omasi-Mӧ sebua, si no ma ma zӧkhi ya’aga tӧra moroi ba ni wӧwӧ’i fefu. Si mane si no te sura ba sura Zinunӧ 139:14, ma faduhu’ӧ wa no ni fazӧkhi danga-U ndra’aga sahӧlihӧli dӧdӧ. Ma’andrӧ saohagӧlӧ mbotoma ba nosoma si no Ö’fazӧkhi si fao fa’omasi.
Jemaat : Ma’andrӧ saohagӧlӧ me ya'ugӧ Lowalangi, no ӧfa’ele’ӧ ndra’u’gӧ khӧma ba daromali-Mӧ safӧnu fa’atuatua ba sindruhu. Faduhu dӧdӧma, ero mabua’ӧ mbekama ba fa’aurima, ya’ugӧ zondrorogӧ si fao fa’omasi si lӧ farӧi.
Liturgos : Ma’andrӧ saohagӧlӧ me ya’ugӧ zi fao khӧma ba daromali-Mӧ, he Lowalangi saohagӧlӧ wa’omasi-Mӧ fa’atuatua ba fondro’rogӧ-Mӧ si lӧ farӧi ba wa’aurima. Yaduhu!
FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!"
Tebe’e ginötö mangandrö ba dödö zamösana föna Lowalangi.
Hakhösi dödö-U khöma Ama, ba be’e aefa khöma horöma andrö ma’afefu, Yaduhu! "NA UBINI'Õ HORÕGU KHÕ YESU"
Jemaat : Manunõ moroi ba Mbuku Zinunõ No. 224 : 1
Liturgos : Si manõ sa wa’omasi Lowalangi nõsi gulidanõ, no Ibe’e Nono-Nia andrõ, si ha sambua, ena’õ lõ tekiko dozi samati khõ-Nia, ena’õ so khõra wa’auri si lõ aetu. Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura
Roma 3 : 21-26
21 Ba noa sa’ae to’ele wa’atulõ dõdõ khõ Lowalangi, baero goroisa, nifaduhu’õ goroisa ba nifaduhu’õ zama’ele’õ andrõ,
22 fa’atulõ dõdõ khõ Lowalangi soroi ba wamati khõ Yesu Keriso, ba zamati andrõ fefu; lõ’õ sa fa’afaehu.
23 Noa sa ahori mamazõkhi horõ ira, ba lõ’õ sa si sõkhi turiara khõ Lowalangi.
24 Ba saoha gõlõ wa iwa’õ Lowalangi satulõ ira, fa’ebua dõdõnia, bõrõ wangõhõli andrõ, ba khõ Keriso Yesu,
25 nifataro Lowalangi hõli, ba ndrõnia andrõ, balazi wamati, ba wangoroma’õ fa’atulõ dõdõnia, bõrõ wa no i’osilõmilagõ horõ fõna,
26 gõtõ wa’ebolo dõdõ Lowalangi, ba wangoroma’õ fa’atulõ dõdõnia ba gõtõ da’e, ena’õ satulõ ia ba ena’õ satulõ gõi, iwa’õ, zamati khõ Yesu.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura
Luka 7 : 41-50
41 So zosugilõ, darua zo’õmõ khõnia; õmõ zi samõsa, ba dua ngaotu a lima wulu rufia, ba õmõ zi samõsa, ba dua wulu a lima.
42 Ba me lõ khõra famu’a, ba faoma ibe’e bualania khõra zugilõnia andrõ. Ba ha niha ba zi darua andrõ zabõlõ mangomasi’õ ya’ia?
43 Itema linia Simoni, imane: Ba dõdõgu, sebua ibe’e buala. Ba imane khõnia: Si ndruhu niwa’õu.
44 Ba ibali’õ ia ba ndra alawe andrõ, imane khõ Zimoni: Hadia, õ’ila ndra alawe andrõ? No mõido ba nomou; idanõ khõgu, ba gahe, ba lõ nibe’eu. Ba da’e, ba no ibasõi tawa hõrõnia gahegu, ba bunia wolosi khõnia.
45 Lõ si fa’ago bawa ndra’ugõ khõgu. Ba da’e, ba i’otarai mõi ia yomo, ba lõ nibatonia fangago ahegu.
46 Lõ nibayoiniu fanikha hõgõgu. Ba da’e, ba no ibayoini gahegu fanikha samohua.
47 Andrõ uwa’õ khõu: No mu’efa’õ khõnia horõ soya andrõ, me no abõlõ wa’omasinia. Ba ba ni’efa’õ si lõ oya’oya, ba lõ abõlõ wa’omasinia.
48 Ba imane ba ndra alawe andrõ: No mube’e aefa khõu horõu.
49 Ba labõrõtaigõ awõnia ba wemanga, lamane dõdõra: Ha niha da’õ, sangefa’õ horõ gõi?
50 Ba imane ba ndra alawe andrõ: Famatimõ zangorifi ya’ugõ; fuli’õ, ya’ohahau dõdõu.
- Famotokhi Taromali Lowalangi
- Sinanõ ba dõdõ tehalõ moroi ba zura
Luka 7 : 50b
Famatimö zangorifi ya'ugö: fuli'ö, ya'ohahau dödöu.
- Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunõ ita moroi ba Mbuku Zinunõ No.
162
- Sihulu tödö wangondrasi, fogaoni Zahakhö tödö.
Ogorofi ngawalö horö, falua wangesa dödö.
Angalulu sifao fangandrö, Ibe’e Yesu wangefa’ö.
- Tebai ahono sa dödöda, na lö mu’efa’ö horö.
Na lö ihagaini Eheha dödöda si no ta’unö.
Samaduhu’ö ba dödöda, wa no tehaogö, no atulö.
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrӧ ita... He Soaya itaria la’ositengagӧ ndra’aga lӧ la’omasi’ӧ. Ma’ide’ide’ӧ ndra’aga ma’ila wa la’aohasi ba dӧdӧ ndra’aga. No mawa’ӧ wehede sabe’e ba niha bӧ’ӧ irege aila ira. Aboto ba dӧdӧma na malau da’ӧ no amaedola ma’ailasi ndra’ugӧ, samasӧkhi ya’aga si no mangi’ila ya’aga ba sangomasi’ӧ ya’aga.
Jemaat : He Soaya fasugi ba dӧdӧma ero inӧtӧ wa ya’ugӧ zamazӧkhi ya’aga fefu si no sӧkhi sibai. Tologa wanema’ӧ sindruhu andrӧ wa ya’aga no khilikhili Lowalangi fondrege zi sӧkhi ba sahӧli dӧdӧ, ena’ӧ la ila niha guli danӧ wa ya’aga no ni omasi’ӧ-U, Yaduhu!
Pengkhotbah : Ba dӧi Zo’aya ya ‘aga Yesu Keriso, si no mamahaӧ ya’aga ba wangandrӧ mamane:
Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba
Mbuku Zinunõ No.
297
- Lö fa’abölöma, wolawa horö.
Si tebai ndra’aga na lö Ya’ugö.
- Rongo gangandröwa, zamati khö-Mö.
Böi bulö’ö khöma wa’omasi-Mö.
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
