Tata Ibadah Natal - I (Bahasa Nias)

Download Tata Ibadah (DOC)

Download Tata Ibadah (PDF)

Senin, 25 Desember 2022 (Natal) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ma’owai ami fefu ba döi Zo’aya ya’ita Yesus Keriso, nitörö tödöda Fa’atumbu ba zi ma’ökhö andre. Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 57 Omuso dödö, omuso dödö, Niha Keriso ma’ökhö. Tobali niha, Yesu So’aya, omuso dödöda ma’ökhö. Omuso dödö, omus odödö, Niha Keriso ma’ökhö. Me no to’ele, Yesu Keriso, omuso dödöda ma’ökhö. Omuso dödö, omuso dödö, Niha Keriso ma’ökhö. I’ohe haga, Yesu Keriso, omuso dödöda ma’ökhö. Omuso dödö, omuso dödö, Niha Keriso ma’ökhö. Me Sangorifi, Yesu Keriso, omuso dödöda ma’ökhö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba no tobali ösi niha daroma li andrö, ba no so Ia khöda, ba no anehega lakhömi-Nia, hulö lakhömi Nono Si ha sambua khö Nama, si no a’oi so fa’ebua dödö, awö wa’aduhu. (Yohane 1:14) HALELUYA! Liturgos : Mangandrõ ita, "He Yehowa Lowalangima si so ba zorugo yawa! Ma’andrö saohagölö khö-U ba wa’ebua dödö-U me no Ö’elegö wa’omasi-Mö ba gulidanö. No Öfatenge Nono-U andrö si ha sambua, ba wangöhöli ya’aga ba huku horö. Ma’andrö khö-U, Öhagaini dödöma andre si no ihawui fa’ogömigömi. Fahaö ndra’aga ba wangandrö saohagölö, börö wa’omasi-Mö ba khö Yesu Keriso solohe khöma fangorifi ba fa’ohahau dödö.. Yaduhu!" Mudadao Zato Liturgos : Manunõ ita moroi ba Mbuku Zinunõ No. 51 Amaedola lewiö, ma’uwu Giza’i. Da’ö Nono situmbu, amabu’ula li. Ya’ia Zo’aya, soroi khö Lowalangi, si möi mangöhöli. Amaedola lewiö, niwa’ö Yesaya. Si no mu’adonogö, tumbu khö Maria. Ya’ia zangalui, ya’ita si no taya, afu te’orifi. Amaedola lewiö, ba li Zakharia. No umbu wangorifi, soroi khö Yehowa. Molakhömi Ia me Ono Lowalangi Fondrege Zalawa. Tasuno Lowalangi, umbu wa’omasi. Me Ifatenge Yesu lala ba wa’auri. Fefu wa’aurida, tabè sumange-Nia, soroi ba wamati. Khö-U, Yesu, mabè dödö, awö wa’aurima. Ya lö faröi ndra’aga, ba wolu’i röfa. Fehi’a dödöma, aro’ö wanötöna, götö wekolima. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunӧ 148 : 1 - 14 1 Haleluya! Misuno Yehowa, moroi ba mbanua si yawa, misuno ia ba zalawa yawa! 2 Misuno ia, ya’ami mala’ika khõnia fefu; misuno ia, ya’ami, sabõlõ khõnia, dozi! 3 Misuno ia, ya’ugõ luo ba ya’ugõ bawa; misuno ia, ya’ami dõfi sihaga andrõ, fefu. 4 Misuno ia, ya’ami fondrege mbanua si yawa ba ya’ami idanõ, si so yawa mbanua si yawa andrõ! 5 Ndramusuno dõi Yehowa andrõ; me no bõrõ niwa’õnia, wa tefazõkhi ira. 6 Ba no ihonogõi naha khõra, si lõ tebulõ; no ifakhoi lala, si tebai lasawõ. 7 Misuno Yehowa, moroi ba guli danõ; ya’ami saliwaliwa ba nasi, awõ zabakha si tou andrõ, fefu! 8 Ya’ami alitõ ba teu kara ba teu si baku ba simbo, ba angi sabõlõ andrõ, samalua niwa’õnia andrõ. 9 Hili andrõ, ba hilihili fefu, eu sowua andrõ, ba eresi fefu; 10 saliwaliwa ba danõ ba urifõ niha, fefu, ba kuõkuõ ba fofo andrõ sihombo; 11 razo ba guli danõ, awõ soi niha fefu, samatõrõ niha ba sanguhuku ba guli danõ, fefu. 12 Ono matua ba ono alawe ba satua ba iraono. 13 Ndramusuno dõi Yehowa, me no ha tõinia zebua: italu’i danõ ba italu’i mbanua si yawa lakhõminia andrõ! 14 Ba no i’alawa’õ dandru andrõ ba mbanuania, fanuno satulõ tõdõ andrõ khõnia, fefu, Iraono Gizeraëli andrõ, banua sahatõ khõnia. Haleluya.” Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 3 : 2 Sumange la’ohe khö-U, mala’ika awö niha. Dozi ira manunö, lasunosuno Yehowa. Lira lö mo’aetufa, götögötö wa’ara. FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi sebua si so ba zorugo yaẅa, aboto ba dödöma,wa no Öfatenge khöma Nono-U Yesu Keriso ba wangefa’ö horöma. Ma’andrö khö-U tologa, heta ba dödöma ngawalö zi lö sökhi, si no amaedola hili salaẅa, ba si no amaedola mbawa danö sabakha, ena’ö monahia ba dödöma Zangorifi andrö, ba wamahaö ya’aga wamalua somasi Ndra’ugö., Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Böi mi’ata’ufi, hi za sa, uturiaigö khömi wa’omuso dodo sabölöbölö, sirugi niha fefu dania, me no tumbu khömi Zangorifi andrö bongi andre, Keriso So’aya, ba mbanua Dawido. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Roma 15 : 7 - 12 7 Andrõ faomo mifonaha nawomi, si mane famonaha Keriso ya’ami, ba wamolakhõmi Lowalangi. 8 Da’õ sa niwa’õgu: no tobali enoni niboto Keriso, bõrõ wa’aduhu Lowalangi, ba wanga’aro’õ amabu’ula li andrõ khõ ndra tua. 9 Ba fa’ahakhõ dõdõ andrõ mbõrõ, wa lafolakhõmi Lowalangi niha baero, si mane si so ba zura: ”Andrõ usuno ndra’ugõ ba niha baero, ba ube’e bõrõ wanuno dõimõ.” 10 Ba so zui, ba imane: ”Mi’omusoi’õ dõdõmi, ya’ami, niha baero, awõ mbanuania.” 11 Ba so zui: ”Misuno Zo’aya, dozi ami, motõi niha baero, ndramusuno ia fefu soi.” 12 Ba so zui, ba imane Yesaya: So dania lewiõ ba mbõrõ Iza’i andrõ, ba si maoso dania, ba wamatõrõ niha baero; khõnia manõtõna dania niha baero. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba möi yomo ndra Ere, ba hiza Nono awö nina-Nia, ba labalöduhini tou danö, mangalulu khö-Nia ba labokai naha gana’ara, mamuala ira khö-Nia, balaki ba kumöyö ba emuri. (fahela Matai’o 2:11) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Luka 2 : 15 - 20 15 Ba me no mofanõ mala’ika andrõ, ba zorugo, me no larõi ira, ba faoma lamane kubalo andrõ khõ nawõra: Talabu ba Mbetilekhema ba tafaigi da’õ, nifa’ombakha’õgõ Zo’aya khõda. 16 Ba la’alio’õ we’amõi, ba falukha ira ndra Maria, Yosefo, awõ nono no mege, nifagaya ba luha. 17 Ba me no la’ila, ba la’ombakha’õ daroma li andrõ, niwa’õ khõra, ba nono andrõ. 18 Ba dozi samondrongo, ba ahõlihõli dõdõ, ba ni’ombakha’õ gubalo andrõ khõra. 19 Ba lõ olifu Maria fefu niwa’õ andrõ, ifatoutou tõdõnia. 20 Ba lafuli ira kubalo andrõ, lafosumange Lowalangi, lasuno ia, ba nirongora ba ba ni’ila hõrõra, balazi niwa’õ khõra. Famotokhi Taromali Lowalangi Sinanõ ba dõdõ tehalõ moroi ba zura Sinunö 86 : 9 Dozi soi, niwöwöimö andrö, ba möi dania mangalulu khö-U, ya’ugö So’aya, awö wamosumange töi-Mö andrö. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 59 Humulu dödöda, wanema Ya’ia. Solohe fangefa, ba huku horöda. Simate ita fefu, na lö Yesu khöda. Tatema’ö Ia, fangorifida. Böi aombö dödöda, Lowalangi Ama. Ibè Nono-Nia, sanolo ya’ita. Sangabölö tödöda, wolau fasöndrata. Ta’ondrasi Ia, ondrasi Ia. Omusola dödö, Yesu zamobörö. Oi tatema wöfö, tou ba gulidanö. Duhu mo’ahonoa, furi na takhamö. Da ta’oigö dödö, wogamö da’ö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 60 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***