Tata Ibadah Natal - II (Bahasa Nias)

Download Tata Ibadah (DOC)

Download Tata Ibadah (PDF)

Selasa, 26 Desember 2022 (Natal Kedua) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ma’owai ami fefu ba döi Zo’aya ya’ita Yesus Keriso, nitörö tödöda Fa’atumbu ba zi ma’ökhö andre. Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 71 Yesu Razo Sangefa’ö, si möi mangatulö. Fefu nösi gulidanö, suno böi mamalö, suno böi mamalö, suno, suno böi mamalö. Fa’omasi Nama khöda Ibè Nono-Nia. Wangorifi dozi niha, samati khö-Nia, samati khö-Nia, dozi samati khö-Nia. Razo Fondrege Zalawa solakhömi Ia. Turiaigö gofu heza, suno Haleluya, suno Haleluya, suno, suno Haleluya. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Tumbu dania khõda nono, tebe’e khõda nono matua; tebe’e ba galisi-Nia wamatõrõ ba tebe’e tõi-Nia Zahõlihõli dõdõ ba Samolala tõdõ ba Lowalangi sabõlõ, ba Ama zi lõ aetu ba Salawa wa’atulõ. (Yesaya 9:6) HALELUYA! Liturgos : Mangandrõ ita, "He Lowalangi Ama khöma, si so ba zorugo! Masuno Ndra’ugö ba ma’andrö saohagölö-U, me no Öfatenge khöma Nono-U Yesu Keriso, si no tobali ösi niha, ba wangorifi ya’aga. Ma’andrö khö-U, be’e ohahau dödöma iada’a ba wanörö tödö fa’atumbu-Nia, ba be’e aboto ba dödöma, wa khöma sibai manandrösa halöẅö-Nia. Ondrasiga göi bongi, si mane me Öfatenge mala’ika sangondrasi ira kubalo luo no; foloi ba dödöma zogömigömi, ba angali’ö haga-Mö andrö, afu tola ma’omasi’ö era’erama zomasi dödö-U, he ba nirongoma, he ba ni’ila höröma, ena’ö tobali fondrou’ö wangaro’ö famatima khö-U, ba ba khö Nono-U, Yesu Keriso. He So’aya! Tolo dozi sangomasi’ö fa’ato’ele-Mö, awö dozi sihulu tödö ba wombalombaloi inõtõ we’aso-Mõ ba luo safuria, ena’ö falukha ira wondrara dödö. Ondrasi göi zofökhö si tebai mangondrasi omo-Mö, ba rara dödö zi numana, sangaröngarö, si göna abula dödö, si tosasa, awö zi so ba gurunga, mendrua manö nifakao gafökha. Tologa Eheha-Mö andrö, ena’ö oi te’orifi ndra’aga fefu ba gamozua. Yaduhu!" Mudadao Zato Liturgos : Manunõ ita moroi ba Mbuku Zinunõ No. 55 Dozi ita sowulo, nikaoni Zo’aya. Da talulu dödöda, möi sumange-Nia. Böi olifu ita, wangandrö saohagölö, fa’omasi-Nia. Ya’ia Zo’aya, soroi khö Lowalangi, Ya dozi tafo’ölö, wa’omasi Nama. Taröi zoya ngawalö, somasi dödöda. Yesu zawatöda, samè khöda Eheha, sanolo ya’ita. Si no mu’adonogö, tumbu khö Maria. Ma’andrö khö-U, So’aya, rorogö ndra’aga. Bè ohahau dödöma, götö wekolima. Afu oi matema, wa’auri si lö aetu, nifabu’u Nama. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Yesaya 44 : 6 - 8 6 Da’õ niwa’õ Yehowa, razo Ndraono Gizeraëli andrõ, sangorifi ya’ira, Yehowa ngahõnõ andrõ: Si fõfõna ndra’o ba safuria ndra’o, ba baerogu, ba lõ Lowalangi. 7 Ba ha niha zihede si mane ya’odo, ba yamufarongogõ ba yamufa’ele’õ khõgu! i’otarai me ufataro soi andrõ, si no gõtõgõtõ fa’ara. Ba si lõ’õ na, salua dania, ba ndramu’ombakha’õ! 8 Bõi ata’u ami ba bõi tokea! Hadia, tenga no ara sibai, me u’ombakha’õ khõmi, me ufarongogõ? Ya’ami sa’ae zi so ba mbõrõ khõgu! Hadia, so Lowalangi, baerogu? Lõ gowe (danedane); lõ ni’ilagu! Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi sebuasi so ba zorugo yaẅa, aboto ba dödöma,wa no Öfatenge khöma Nono-U Yesu Keriso ba wangefa’ö horöma. Ma’andrö khö-U tologa, heta ba dödöma ngawalö zi lö sökhi, si no amaedola hili salaẅa, ba si no amaedola mbawa danö sabakha, ena’ö monahia ba dödöma Zangorifi andrö, ba wamahaö ya’aga wamalua somasi Ndra’ugö., Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Böi mi’ata’ufi, hi za sa, uturiaigö khömi wa’omuso dodo sabölöbölö, sirugi niha fefu dania, me no tumbu khömi Zangorifi andrö bongi andre, Keriso So’aya, ba mbanua Dawido. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 1 : 9 - 14 9 Mõi sa’ae ba guli danõ haga si ndruhu andrõ, sohagaini niha fefu. 10 No so ia ba guli danõ, ba khõnia mbõrõta hadia ia, fefu, ba lõ aboto ia ba dõdõ niha ba guli danõ. 11 No khõnia ba zi mõi ia, ba lõ lafonaha ia khõra banuania. 12 Ba ha wa’ato zamonaha ya’ia, khõra itehe, tobali ono Lowalangi ira, khõ zamati ba dõinia andrõ. 13 Tenga moroi ba ndro tumbu ira, ba tenga moroi ba wa’edõna nõsi niha ba tenga moroi ba wa’edõna ndra matua, moroi ba Lowalangi tumbu ira. 14 Ba no tobali õsi niha daroma li andrõ, ba no so ia khõda, ba no anehega lakhõminia, hulõ lakhõmi Nono, si ha sambua khõ Nama, si no a’oi so fa’ebua dõdõ, awõ wa’aduhu. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Sinunӧ 96 : 1 - 13 1 Mi’anunõ khõ Yehowa, sinunõ si bohou. Mi’anunõ khõ Yehowa, dozi tanõ. 2 Mi’anunõ khõ Yehowa, misuno dõinia andrõ; mi’ombakha’õ wangorifi andrõ khõnia, ero ma’õkhõ. 3 Midunõdunõ ba niha baero duriania, ba ba niha fefu zahõlihõli dõdõ andrõ khõnia. 4 Me no sebua Yehowa, ba me no si nangea nisuno sibai, ni’ata’ufi, yawa Lowalangi bõ’õ, fefu. 5 Lowalangi niha baero andrõ sa, ba adu; ba Yehowa, ba no samazõkhi banua si yawa. 6 Lakhõmi ba fa’amoadu fõnania; fa’abõlõ ba lakhõmi ba ni’amoni’õ andrõ khõnia. 7 Mibe’e khõ Yehowa, ya’ami ngawalõ soi niha, mibe’e khõ Yehowa zumange ba fa’abõlõ. 8 Mibe’e khõ Yehowa zumange dõinia andrõ; mi’ohe game’ela ba mi’ae ba golayama andrõ khõnia. 9 Mi’angarõfi li Yehowa, mi’ohe wangehao ni’amoni’õ andrõ; mi’anizinizi fõnania, dozi tanõ. 10 Mimane ba niha baero: Razo sa’ae Yehowa! Ba no aro gõi golia uli danõ, tebai mangiwa. Ifatõrõ ba zadõlõ soi niha andrõ. 11 Omuso dõdõ mbanua si yawa, ba ma’iki guli danõ, mu’ugu’ugu nasi ba õsinia andrõ. 12 Ikaraini wa’iki benua andrõ ba hadia ia ba khõnia; ba fefu dõla geu sa’ae dania ba gatua, ba omuso sibai dõdõ. 13 Fõna Yehowa; so ia sa moroi sa, so ia, ba wanguhuku õsi guli danõ. Ihuku dania golia uli danõ ba wa’atulõ, ba ihuku soi niha ba wa’aduhu andrõ khõnia. Famotokhi Taromali Lowalangi Sinanõ ba dõdõ tehalõ moroi ba zura Sinunӧ 96 : 10a Mimane ba niha baero: Razo sa’ae Yehowa! Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 61 Hewa’ae ha ba kandra, to’ele’Ö föna. Ba no sa solakhömi, si’otarai Nama. Yesu, Yesu, si’otarai Nama. Ba dozi sangondrasi, simöi mangalulu. Fefu oi mo’urakha, tobali tana khö-U. Yesu, Yesu, tobali tana khö-U. Andrö Öröi lakhömi, we’amöi ba khöma. Folo’ö-Mö li Nama, tobali hölima. Yesu, Yesu, tobali hölima. Fondrege wa’asökhi, we’aso Zo’aya. Solohe fangorifi, ba niha fefu sa. Duhu, duhu, ba niha fefu sa. Lö uröi’Ö Keriso, ba u’o’ö li-Mö. He auri, he matedo, Ya’ugö zawatö. Duhu, duhu, Ya’ugö zawatö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 72 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***