Rabu, 1 Januari 2025
(Tahun Baru)
FANGOWAI BA FOGAONI
[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI
Liturgos : Ya’ami banua niha Keriso,ba wondrugida böröta ndröfi sibohou andre, ma’owai ami ba döi Zo’aya yaita Yesu Keriso. Ya’ahowu ndröfi sibohou!
Jemaat : Ya'ahowu!
Liturgos : Yafao-fao khõmi Lowalangi!
Jemaat : Ya fao khõu Geheha-Nia!
FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ Numero 73 : 1-2
- Ma’andrö saohagölö, wa’omasi-Mö khöma.
Ba ndröfi sinumalö, no oi Örorogöga.
- Ba lala döröwama, no Öfasao ndra’aga.
No Ötuturu lala, no Ötimba de’ala.
- No Ötolo ndra’aga, wanga’i halöwöma.
No oi Öfahowu’ö, andrö wa no mo’ölö.
- Ba ngawalö zafökhö, si no tohare khöma.
He göi ba noro dödö, no oi Ö’efa’öga.
- He no fahöna lalö, me ambö fangenanö.
No Öbologö dödö, hulö zi no atulö.
- Andrö masunosuno, Ndra’ugö he So’aya.
Fangandrö ba fanunö, zumange ni’ohema.
- Töröwa wa’aurima, ba fozu wekolima.
Ha Ya’ugö zangila, ba ndröfi mifönama.
- He Yesu da matou’ö, ba danga-Mö, ndra’aga.
Aro’ö wamatima, dou’ö wanötönama.
FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Ufaöga hörögu, ufaigi hili andrö: Heza i’otarai fangorifigu? Fangorifigu andrö, ba i’otarai Yehowa, somböi banua si yawa, awö danö. Lö’ö sa Ibe’e mangiwa gaheu; samaigimaigi ya’ugö andrö, ba lö manuköu. Irorogö ndra’ugö Yehowa, Itimba zi lö sökhi fefu, Irorogö nosou (Sinunö 121:1-3, 7)
HALELUYA!!!
 Liturgos : Mangandrõ ita, "He Yehowa Lowalangima, si no umbu howuhowu ba fa’omasi. Möiga khö-U mangalulu ba wangandrö saohagölö me lö si faröi Ndra’ugö khöma ba zi döfi fa’ara, irege no makhamö mböröta ndröfi sibohou andre. Lö mamalö matou’öga ba danga-U ba zi döfi fa’ara mifönama. Ma’andrö khö-U, rorogöga ba wanohugö fekolima. Fatöröga ba lala andrö khö-U, ba fahaö ndra’aga ba wango’aurifagö fa’omasi, he ba wangomasi’öma Ya’ugö, ba si manö göi ba wangomasi’öma awöma niha awö niwöwöi fefu. Ya’ugö gubaloma, samatörö ya’aga ba si lö faröi khöma ba zi döfi fa’ara mifönama. Yaduhu! Mudadao Zato
Liturgos : Manunõ ita moroi ba Mbuku Zinunõ Numero 80
- Na tanehesi ita, ba ndröfi nitalu’ida.
No fahöna horöda, ndrotondroto oi fasala.
Fa’omasi Zo’aya, wa tola auri ita.
- So göi zi lö mondrugi, inötö ba zi so ita.
No Ikaoni So’aya, oi Ifolombase ira.
Ba wombaloi inötö, wangawuli Zo’aya.
- He So’ayatologa, ba lalama zui miföna.
Be’e anau gölöma, wolo’ö somasi Nama.
Ena’ö oi marugi, naha-U si so fa’auri.
- Yesu, rara göi dödö, zi so ba wangaröngarö.
Sitosasa, sofökhö, ba sabutödö ba horö.
Tolo ira So’aya, be’e khöra Geheha.
- Tolo ndra enoni-Mö, be’e wa’owölö’ölö.
Nönö wangodödögö, ba wanga’ira halöwö.
Afu oi sanau ölö, wanga’i halöwö-Mö.
- Ba danga-U da matou’ö, fefu mbanua-U So’aya.
Si no arörö tödö ba lakhömi gulidanö.
Fatörö wa’aurira ohe ba zomasi’Ö.
FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura Yeremia 17 : 7-8
7 Ba ya’ahowu niha, sanõtõna khõ Yehowa, same’e fa’abe’e dõdõnia Yehowa!
8 Eu nitanõ ba mbewe nidanõ ia, sangoro’õ wa’ania ba mbombo ba si lõ ata’u na aukhu zino; lõ aleu mbulunia ba lõ abu dõdõ, na dõfi si lõ teu, ba lõ mo’otalua wowua.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 3:2 SUMANGE LA'OHE KHÕU
 FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö, ba wangalulu ba ba wangandrö saohagölö, ba howuhowu si no falukha ndra’aga ba ndröfi si no matalu’i, ba me no Öfasao ndra’aga ba mböröta ndröfi sibohou andre. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua ba ndröfi si no numalö, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba ndröfi andre si faudu ba zomasi Ndra’ugö"
Jemaat : Manunõ moroi ba Mbuku Zinunõ No. 224 : 1
Liturgos : "Mi’aine khö-Gu, dozi serege tödö, awö zonoro, ba Ufolombase ami. Mihare’ö khömi kalo mbagi andrö khö-Gu ba mitöngöni khö-Gu, me no sebolo tödö Ndra’o ba si lö fayaŵa tödö, ba falukha ami wolombase dödömi. Moguna sa kalo mbagi andrö khö-Gu, ba no aoha noro andrö khö-Gu." Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura Halõwõ Zinenge 20 : 17-24
17 Ba moroi ba Mileti, ba infatenge ba Nefeso, ifakaoni’õ zatua mbanua.
18 Ba me no mõi ira khõnia ba imane khõra: Mi’ila, he uwisa ba khõmi, ero ma’õkhõ, iotarai luo me uhundragõ danõ Azia.
19 Enoni Zo’aya ndra’o, ma’ifu lõ si fayawa ndra’o, mowõi dawa hõrõgu, ba so wanandraigõ, si gõna ndra’o, ba wamagõnaisi niha Yehuda ya’o.
20 Mi’ila he uwisa, wa lõ nitahagu soguna khõmi, si lõ u’ombakha’õ khõmi, si lõ ufobawa lala khõmi, ba zi so niha sato ba yomo gõi,
21 wamaduhu’õ ba niha Yehuda ba ba Ndrawa Heleni famalalini era’era khõ Lowalangi, awõ wamati khõ Zo’aya ya’ita, Yesu Keriso.
22 Ba hiza iada’e, usawa Yeruzalema, amaedola zi so ba wesu dõdõgu; hadia zi gõna ndra’o ba da’õ, ba lõ u’ila,
23 baero nifaduhu’õ Geheha ni’amoni’õ khõgu, ba mbanua misa, iwa’õ, ibalobaloi ndra’o bõbõ ba famakao.
24 Ba lõ ba dõdõgu nosogu, lõ itõrõ ligu na i, ba wango’ozui lalagu, awõ halõwõgu andrõ, nitemagu khõ Zo’aya, Yesu, famaduhu’õ turia somuso dõdõ, turia wa’ebua dõdõ Lowalangi andrõ.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ ba aefa da'õ ifa'ema wasõmbata khõ Pengkhotbah. Awai da'õ mangawuli ba nahia zamõsana]
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura Mataio 25 : 14-30
14 Hulõ niha sofanõ: Humede ia ba zawuyunia, ibe’e ba dangara zi so khõnia.
15 Ibe’e ba zi samõsa, ba lima balaki, ba ba zi samõsa, ba dua balaki, ba ba zi samõsa, ba samba fondruyu, dali wa’abõlõ zamõsana, ba mofanõ ia.
16 Ba i’anema’õ mõi nibe’e si lima balaki, ilau ba waniaga, ba fabali.
17 Si manõ gõi nibe’e si dua balaki, fabali ibe’e.
18 Ba nibe’e si samba fondruyu, ba mõi mogo’oli tanõ, ibini’õ bakha gana’a zokhõ ya’ia.
19 Ba me no ara, ba so zokhõ sawuyu andrõ, ba mangerai õmõ ia khõra.
20 Ba i’ondrasi ia nibe’e si lima balaki, i’ohe gõi zi lima balaki harenia, imane: Lima balaki nibe’eu ba dangagu, Tua faigi, lima balaki tõ, nisõndragu, harenia.
21 Imane khõnia sokhõ ya’ia: Lau, sawuyu si sõkhi, si lõ farõi; lõ si farõi ndra’ugõ ba zi lõ oya’oya, ba ube’e barõ mbawau zoya; tabu ba wa’omuso dõdõ andrõ khõ zokhõ ya’ugõ.
22 Ba i’ondrasi gõi ia nibe’e si dua balaki, imane: Dua balaki nibe’eu ba dangagu, Tua, faigi dua balaki tõ nisõndragu harenia.
23 Imane khõnia sokhõ ya’ia: Lau, sawuyu si sõkhi, si lõ farõi; lõ si farõi ndra’ugõ ba zi lõ oya’oya, ba ube’e barõ mbawau zoya; tabu ba wa’omuso dõdõ andrõ khõ zokhõ ya’ugõ.
24 Ba i’ondrasi ia gõi nibe’e si samba fondruyu andrõ, imane: He Tua, no u’ila ndra’ugõ, wa niha sabe’e huku ndra’ugõ; mamasi ndra’ugõ ba zi lõ nitarumõ ba mangozara’õ ba zi lõ nifazaeweu,
25 ba no ata’u ndra’o, ba no mõido mubini’õ zi samba fondruyu andrõ khõu barõ danõ; ba ya’ae khõu gana’au.
26 Ba itema linia sokhõ ya’ia, imane khõnia: He sawuyu si lõ sõkhi, sareu! Na no õ’ila mamasi ndra’o,ba zi lõ nitarugu ba mangozara ndra’o, ba zi lõ nifazaewegu;
27 ba õbe’e mena’õ nifalali wirõgu andrõ, ba zamalali ana’a, ba na so ndra’o, ba utema ena’õ gana’agu, fabaya hare.
28 Ba mihalõ khõnia zi samba fondruyu andrõ, ba mibe’e ba zi so si fulu balaki.
29 Dozi sa, ba zi so ba tebe’e na ba tehõna khõra; ba ba zi lõ õ, ba teheta gõi zi so khõnia.
30 Ba sawuyu andrõ, si lõ guna, ba mitibo’õ baero ba zogõmigõmi. Ba fege’ege dania ba da’õ ba fatangisa mboha.
- Famotokhi Taromali Lowalangi
- Sinanõ ba dõdõ tehalõ moroi ba zura Mataio 25 : 21a
Imane khõnia sokhõ ya’ia: Lau, sawuyu si sõkhi, si lõ farõi; lõ si farõi ndra’ugõ ba zi lõ oya’oya, ba ube’e barõ mbawau zoya.
- Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunõ ita moroi ba Mbuku Zinunõ No: 145
- Me somasi Yesu, na aefa ba huku, ita fefu.
Andrö no Itaha, fefu wango’aya,
si möi fangöhölida ba wönu.
- No ala zatana awö golalöwa, möna Yesu.
Fa’abölö Nama wemöna Zo’aya,
möi fa’aurida wemaoso-Nia.
- Omuso dödöda, wanörö lalada ba wekoli.
Me Yesu nawöda, kubalo si sökhi,
I’ohe, Ifasao ba lakhömi.
- He Yesu tologa, bè anau gölöma ba wamati.
Rorogö ndra’aga, ha khö-U ahonoga,
falua fasaoga ba wa’auri.
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba Mbuku Zinunõ No. 472
- Wa’ato ndra talifusö, si lö irugi haga.
No balunö hörö dödö, no iba’a afökha.
Da tafazaewe danömö, taromali Zo’aya.
Afu mowa’a ba dödö, wamati khö Zo’aya.
- Möi ita taturiaigö, daroma li Zo’aya.
He akao, he agafökhö, böi tafatou de’ala.
Ta’oigö dödö wolo’ö, me oroisa Zo’aya.
Me fa’auri nitemada ba luo safuria.
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
|
